حوار =====ــ محمد رشاد

حوار
==========
كنا صغار ورثونا حضارتنا
درسوا لنا التاريخ في مدارسنا
حكوا لنا عن عشتار
ونبو خذ نصر وصلاح الدين
كنت وقتها متحفز أشارك في حطين
وزاد انبهاري وقتها
ومثلت علي أمي دور الفارس
وانتصرت في المعركة
وافتخرت وقتها بعروبتي
ولما كبرت وصرت افهم
خذلوني
باعوا الرقاب بابخس الأثمان
اللي بدوا كرسي الوزارة
واللي يطمع في البرلمان
نسيوا العلوم والتاريخ والأزمان
أبدلوا مرادفات اللغة بمصطلحات غربية
مع أنها لغة القرآن
بدلوا معها كمان الهوية
ومزقوا الجبة والقفطان
الكل عايز نجمة ونيشان
وأصبح الفارق شاسع بين الثقافات
الغرب طلعوا القمر
وإحنا لسه نترحم علي اللي فات
مدارسنا نعق فيها الغراب
ومدارسهم تألقت في الحبر والحساب
والشباب أدمن الفيس
وينتقل من شات إلي شات
والقرار اللي تأخر من كام ألف عام
والبيعة اللي بتجبر عليها
في عز الصمت وبدون كلام
واللي بطونهم أتملت وبطن غيره جوعان
واللي مزقت أوصاله الفاقة
ونسي طعم الحنان
كثير في عز البرد مأواهم
واكتر في عز الحر مثواهم
وبأسلحتهم عم الدمار
والغريبة أن الصحبة شرياهم
والثقافات مازالت تتصارع
والحروب دايره من شارع إلي شارع
والفتن أصبحت كظلام الليل
وساد التفتت ومش محتاج لدليل
خربوا المدن وهجروا الأوطان
ومش فاضل غير أنهم يمنعوا الأذان
ربنا ع الظالم والمفتري
اللي عايز يورث
واللي عايز يشتري
واللي عايز يفضل كابس
 علي نفس الناس ويفتري
ونسي انه في يوم ح يقابل رب كريم
ــــــــــــ
محمد رشاد